ठाणे महापालिकेतील विविध कामगारांचे प्रश्न आणि हिरानंदानी इस्टेट व लोढा गृहसंकुलातील रहिवाशांच्या समस्या लागणार मार्गी

 

खासदार नरेश म्हस्के यांच्या मागण्यांना ठाणे महापालिका आयुक्त सौरभ राव यांचा सकारात्मक प्रतिसाद

ठाणे - राष्ट्रीय शहरी आरोग्य अभियानांतर्गत काम करणाऱ्या कर्मचाऱ्यांना सरळसेवा भरतीने सामावून घेणे, डाटा एन्ट्री कामगारांचे मानधन वाढविणे, सफाई कर्मचाऱ्यांना किमान वेतन, पालिकेच्या निवृत्त कर्मचाऱ्यांची देणी त्वरित देणे, हिरानंदानी इस्टेट येथील रहिवाशांना नागरी सुविधा उपलब्ध करुन देणे, माजिवाडा येथे लोढा गृहसंकुलात पावसात शिरणाऱ्या पाण्यापासून मार्ग काढणे आदी विविध प्रश्नांवर आज खासदार नरेश म्हस्के यांनी ठाणे महापालिका आयुक्त सौरभ राव यांच्याशी चर्चा केली. आयुक्तांनी सर्व मागण्यांवर सकारत्मकता दाखवत मागण्या मार्गी लावण्याचे आश्वासन दिले आहे.

ठाणे महापालिका आयुक्त सौरभ राव यांच्या दालनात आज खासदार नरेश म्हस्के यांनी भेट घेऊन विविध विषयांवर चर्चा केली. यावेळी हिरानंदानी इस्टेट फेडरेशन, लोढा गृहसंकुलातील सोसायटीचे पदाधिकारी, पालिका अधिकारी उपस्थित होते.

राष्ट्रीय शहरी आरोग्य अभियानांतर्गत ठाणे महापालिकेच्या माध्यमातून गेली अनेक वर्ष कामगार ठाणेकरांना आपली सेवा देत आहेत. शासन अध्यादेशाप्रमाणे सरळ सेवेतून त्यांना पालिकेत सामावून घेणे अपेक्षित आहे. याबाबत आयुक्तांकडे हा विषय प्रलंबित आहे. १० वर्षांपेक्षा अधिक काळ सेवा देणाऱ्या ७० टक्के कामगारांना पालिकेत सामावून घेण्याची मागणी खासदार नरेश म्हस्के यांनी केली. आयुक्त सौरभ राव यांनी या मागणीला सकारत्मकता दाखवत पालिकेत सामावून घेण्याची प्रक्रिया लवकरात लवकर मार्गी लावण्याचे आश्वासन दिले.  

ठाणे महापालिकेत २०१५ सालापासून २९ कर्मचारी अवघ्या १२ हजार रुपयांच्या मानधनावर काम करत आहेत. हे सर्व कर्मचारी उच्चशिक्षित असून तुटपुंज्या मानधनावर काम करत असल्याने त्यांना त्वरित मानधन वाढ देण्याची मागणी यावेळी करण्यात आली. तसेच आरोग्य केंद्रांवर सफाई कामगार आणि सहाय्यक अवघ्या १२ हजार रुपयांत काम करत असून १५ व्या वित्त आयोगानुसार या कामगारांना मानधन वाढवून देण्याची मागणी खासदार नरेश म्हस्के यांनी केली.  

हिरानंदानी इस्टेट येथील विकासकाने येथील रहिवाशांना अनेक वर्ष टाऊनशिपच्या नावाखाली नागरी सुविधांपासून वंचित ठेवले आहे. ज्या मैदानात विकासक मॅरेथॉन घेतो त्याच मैदानात स्थानिक रहिवाशांना खेळू दिले जात नाही. मोकळ्या भूखंडावर क्लब हाऊस, अॅम्पी थिएटर उभारले जाऊ शकते मात्र टाऊनशिपचे नाव घेत या सुविधांपासून रहिवाशांना वंचित ठेवले जात आहे. या विकासकावर त्वरित कारवाई करावी, अशी मागणी यावेळी खासदार नरेश म्हस्के यांनी केली. तसेच टाऊनशिप पूर्ण व्हायला अजून २५ वर्ष जातील तोवर रहिवाशांना वाऱ्यावर सोडले जाणार का असा प्रश्न खासदार नरेश म्हस्के यांनी विचारत तातडीने नगरविकास खात्याचे सचिव असिम गुप्ता यांच्याशी नागरी सुविधांबाबत पत्रव्यवहार पालिकेने करण्याची सूचना केली.  यावेळी हिरानंदानी इस्टेट फेडरेशनची कमिटी, शाखाप्रमुख प्रवीण नागरे उपस्थित होते. 

थोड्याशा पावसाने माजिवाडा येथील लोढा पॅराडाईज गृहसंकुलातील १३ इमारतींच्या बेसमेंटमध्ये नाल्यातून येणारे पाणी १० फुट तुंबते. यामुळे रहिवाशांच्या गाड्यांचे अतोनात नुकसान होते. यावेळी रहिवाशांनी एक सादरीकरण आयुक्तांपुढे करत रुस्तमजी विकासकाने चुकीच्या पध्दतीने केलेले बांधकाम आयुक्तांच्या निदर्शनास आणून दिले. लोढा बिल्डरने सुविधा म्हणून दिलेले टेनिस कोर्ट आता डीपी रस्त्यात येत आहे. बिल्डरच्या विरोधात यावेळी रहिवाशांनी फसवणूक झाल्याची तक्रार केली. रहिवाशांना त्रास न देता हा डीपी रोड ४ मीटरने वाढविण्याची मागणी खासदार नरेश म्हस्के यांनी केली. आयुक्त सौरभ राव यांनी सर्व मागण्यांचा सकारात्मक विचार करून त्या पूर्ण करण्याचे आश्वासन खासदार नरेश म्हस्के यांना दिले.