राष्ट्रीय छायाचित्र स्पर्धा आणि प्रदर्शनाचे उद्घाटन

 

 प्रताप सरनाईक आणि आमदार निरंजन डावखरे यांची उपस्थिती

*प्रदर्शन सकाळी १० ते रात्री ०९ या वेळेत खुले राहणार*

*ठाणे  :*  छायाचित्रकारांनी टिपलेले विश्व अनुभवण्याची मोठी संधी राष्ट्रीय छायाचित्र स्पर्धा आणि प्रदर्शनाच्या निमित्ताने ठाणेकरांना मिळाली आहे. जास्तीत जास्त नागरिकांनी, विद्यार्थ्यानी पुढील चार दिवसात हे प्रदर्शन पहावे, असे प्रतिपादन आमदार प्रताप सरनाईक यांनी केले आहे. 

ठाणे महानगरपालिका आणि ठाणे दैनिक पत्रकार संघ यांच्या संयुक्त विद्यमाने आयोजित करण्यात आलेल्या राष्ट्रीय छायाचित्र स्पर्धा आणि प्रदर्शनाचे उद्घाटन श्री. सरनाईक यांनी शनिवारी सकाळी केले. या प्रसंगी, आमदार निरंजन डावखरे, अतिरिक्त आयुक्त प्रशांत रोडे, उपायुक्त (माहिती जनसंपर्क) उमेश बिरारी, उपायुक्त (क्रीडा) मीनल पालांडे, ठाणे दैनिक पत्रकार संघाचे अध्यक्ष आनंद कांबळे, तसेच निलेश पानमंद, विभव बिरवटकर, प्रफुल्ल गांगुर्डे, अनुपमा गुंडे, विकास काटे, अशोक गुप्ता, पंकज रोडेकर, आदी पदाधिकारी तसेच ज्येष्ठ छायाचित्रकार दीपक जोशी उपस्थित होते. उद्घाटनानंतर आमदार प्रताप सरनाईक व आमदार निरंजन डावखरे यांनी संपूर्ण प्रदर्शन पाहिले आणि छायाचित्रकारांचे कौतुक केले.

जागतिक छायाचित्र दिनाच्या निमित्ताने सलग दुसऱ्या वर्षी देशपातळीवरील प्रदर्शन आणि स्पर्धा यांचे आयोजन हिंदूहृदयसम्राट बाळासाहेब ठाकरे स्मारक येथे करण्यात आले आहे. 

ठाणे महानगरपालिका ही सांस्कृतिक क्षेत्रातही नेहमी आघाडीवर असते. धर्मवीर आनंद दिघे आणि वसंतराव डावखरे यांनी रुजवलेली ही संस्कृती मा. मुख्यमंत्री एकनाथ शिंदे यांनी पुढे कायम ठेवली आहे. त्यामुळेच असे चांगले उपक्रम आयोजित केले जातात. ठाणे शहर दैनिक पत्रकार संघानेही हा चांगला उपक्रम हाती घेतला आहे. या प्रदर्शनाची ख्याती देशभर पसरावी, अशा शुभेच्छा याप्रसंगी आमदार श्री. सरनाईक यांनी दिल्या.

छायाचित्र काढायला मेहनत लागते. नेमका क्षण टिपणे हे कौशल्य आहे. त्याचेच प्रत्यंतर आज पुन्हा हे प्रदर्शन पाहताना आले. छायाचित्रकारांना व्यवसायाचे संरक्षण मिळावे यासाठी महापालिका आणि सरकार यांनी विचार करावा, अशी सूचना आमदार निरंजन डावखरे यांनी केली.

छायाचित्रकारांच्या कलेला प्रोत्साहन मिळावे यासाठी हे प्रदर्शन भरविण्यात आले. स्पर्धा घेण्यात आली. त्याला देशभरातून चांगला प्रतिसाद लाभला आहे. आता नागरिकांनी ही कला प्रत्यक्ष भेट देवुन पहावी, असे आवाहन ठाणे शहर दैनिक पत्रकार संघाचे अध्यक्ष आनंद कांबळे यांनी याप्रसंगी केले. 

या निमित्ताने घेण्यात आलेल्या राष्ट्रीय स्तरावरील स्पर्धेत जिल्हा, राज्य आणि राष्ट्रीय असे तीन गट होते. शिवाय महाविद्यालयीन गटही होता. या स्पर्धेचा पारितोषिक वितरण समारंभ मंगळवार, २० ऑगस्ट रोजी दुपारी ४.३० वाजता होणार आहे.

*प्रदर्शन नागरिकांसाठी विनामूल्य खुले*

ठाणे महानगरपालिका आणि ठाणे दैनिक पत्रकार संघ यांच्या संयुक्त विद्यमाने जागतिक छायाचित्र दिनाच्या निमित्ताने  आयोजित करण्यात आलेले हे प्रदर्शन आजपासून मंगळवार, २० ऑगस्टपर्यंत दररोज सकाळी १० ते रात्री ९ या काळात नागरिकांना पाहण्यासाठी विनामूल्य खुले आहे.