‘एक पेड मॉं के नाम’ अभियान तसेच ठाणे महापालिकेच्या मुख्यमंत्री हरित ठाणे अभियान या अंतर्गत मा. मुख्यमंत्री एकनाथ शिंदे यांच्या हस्ते झाले वृक्षारोपण

लोकमान्य नगरलगत संजय गांधी राष्ट्रीय उद्यानातील राखीव वन क्षेत्रावर ६० हजार झाडे लावण्याच्या मोहिमेचा झाला शुभारंभ

ठाणे :  राज्यातील सर्व महापालिकांनी एक लाख झाडे लावावीत असे निर्देश दिले असून या निर्देशाचे पालन करणारी ठाणे ही एकमेव महापालिका असून ५ जून २०२४ पासून आतापर्यंत ठाणे महापालिकेने ६१ हजार झाडे लावली असल्याचे सांगत मा. मुख्यमंत्री एकनाथ शिंदे यांनी आयुक्त सौरभ राव यांचे कौतुक केले. तसेच एक पेड माँ के नाम'  या पंतप्रधान नरेंद्र मोदी यांनी केलेल्या आवाहनाला प्रतिसाद देऊन प्रत्येकाने आपल्या आईच्या नावे एक झाड लावावे असे आवाहनही मुख्यमंत्र्यांनी उपस्थितांना केले.

        ठाणे महानगरपालिका, महाराष्ट्र वन विभाग, ग्रीन यात्रा आणि टाटा कन्सल्टन्सी सर्व्हिसेस यांच्या संयुक्त विद्यमाने मुख्यमंत्री हरित ठाणे अभियानात एक लक्ष वृक्ष लागवड तसेच, 'एक पेड मां के नाम' या अभियानाचा शुभारंभ वृक्षारोपण करून मा. मुख्यमंत्री एकनाथ शिंदे यांच्या हस्ते संजय गांधी राष्ट्रीय उद्यान, लोकमान्य नगर येथे करण्यात आला.

      

          या कार्यक्रमास खासदार नरेश म्हस्के, आमदार प्रताप सरनाईक, महापालिका आयुक्त सौरभ राव, अतिरिक्त आयुक्त संदीप माळवी, उपायुक्त शंकर पाटोळे, उपायुक्त मनोहर बोडके, संजय गांधी राष्ट्रीय उद्यानाचे उपसंचालक उदय ढगे, वरिष्ठ उद्यान अधीक्षक केदार पाटील, ज्येष्ठ माजी नगरसेवक हणमंत जगदाळे, एकनाथ भोईर, दिगंबर ठाकूर, विहंग सरनाईक, माजी नगरसेविका राधाबाई जाधवर, आशा डोंगरे, वनिता घोगरे, प्राजक्ता खाडे, माजी वृक्ष प्राधिकरण समिती सदस्या नम्रता भोसले, तसेच ग्रीन यात्राचे प्रतिनिधी आदी उपस्थित होते.

        

         ग्लोबल वॉर्मिगमुळे पर्यावरण असंतुलित झाले असून त्याचे संतुलन राखण्यासाठी जास्तीत जास्त झाडे लावणे ही काळाची गरज झाली आहे. पर्यावरणासाठी वृक्ष लागवड हा एकमेव उपाय असल्याचेही मुख्यमंत्री श्री. शिंदे यांनी नमूद केले. 'एक पेड माँ के नाम' या अभियानाच्या माध्यमातून लाखो झाडे लावण्यात येणार आहेत. यासाठी प्रत्येकाने आपल्या आईच्या नावे एक झाड लावावे असे आवाहनही त्यांनी यावेळी केले.

          मुख्यमंत्री एकनाथ शिंदे यांनी संपूर्ण राज्यात जाहीर केलेल्या लाडकी बहीण या योजनेस उत्स्फूर्त मिळत असून या योजनेचे दोन हप्ते महिलांच्या खात्यात जमा झाले. महिलांसाठी ही योजना सुरू केल्याबद्दल लोकमान्य नगर मधील महिलांनी मुख्यमंत्र्यांना राखी बांधून रक्षाबंधनाचा सण साजरा केला.

 

                   वृक्षारोपणाविषयी...

       मा. मुुख्यमंत्री एकनाथ शिंदे यांच्या संकल्पनेनुसार ठाण्यातील हरित क्षेत्र वाढविण्यासाठी महापालिका आयुक्त सौरभ राव यांच्या मार्गदर्शनाखाली मुख्यमंत्री हरित ठाणे अभियान सुरू करण्यात आले. त्यात, स्थानिक प्रजाती आणि बांबू प्रजाती अशी एक लाख वृक्षांची लागवड करण्याचा संकल्प ठाणे महापालिकेने केला होता. त्यात, अभियानात संजय गांधी राष्ट्रीय उद्यान येथे ६० हजार झाडे वन विभागाच्या सहकार्याने लावण्यात येत आहेत. २५ हेक्टरवरील या शास्र्ोक्त लागवडीसाठी ग्रीन यात्रा आणि टाटा कन्सस्टंसी सर्विसेस यांचे सहकार्य लाभले आहे. या लागवडीत, ताम्हण, बकुळ, जांभूळ, कडुनिंब, कांचन, बेहडा, महोगनी, सप्तपर्णी, पुत्रंजिवा, वड, अडुळसा, करवंद, बाभूळ, आवळा, कोकम, मोह, फणस, अमलताश, बांबूसा व्हेंट्रीकोसा, बाबंूसा मल्टिप्लेक्स, गिगान्तो आदी प्रजातींचा समावेश आहे.