ठाण्यात यावर्षी गणेश मूर्ती विसर्जनासाठी फिरती व्यवस्थाही सज्ज

चार प्रभाग समिती क्षेत्रांमध्ये ०६ फिरत्या व्यवस्था सज्ज राहणार
महापालिका आयुक्त सौरभ राव यांच्या संकल्पनेतून नागरिकांच्या सोयीसाठी केली जाणार व्यवस्था
त्याचबरोबर, ०९ विसर्जन घाट, १५ कृत्रिम तलाव, १० मूर्ती स्वीकृती केंद्र आणि ४९ टाकी विसर्जन व्यवस्थाही सज्ज

ठाणे: ठाणे महापालिका क्षेत्रात यंदा गणेश मूर्ती विसर्जन करण्यासाठी सहा फिरत्या विसर्जन व्यवस्थांची व्यवस्था करण्यात येणार आहे. महापालिका आयुक्त सौरभ राव यांच्या संकल्पनेतून ही व्यवस्था तयार झाली असून त्यात विसर्जनाची व्यवस्था असलेला ट्र्रक ठरलेल्या वेळी वेगवेगळ्या ठिकाणी फिरणार आहे. त्या ट्रकवरील टाकीत गणेश मूर्तींचे विसर्जन करता येणार आहे.

महापालिका आयुक्त सौरभ राव यांच्या निर्देशानुसार, बांधकाम विभाग, पर्यावरण विभाग आणि घनकचरा विभाग यांनी विसर्जन व्यवस्थेचे नियोजन केले आहे. त्यात, ०९ विसर्जन घाट, १५ कृत्रिम तलाव, १० मूर्ती स्वीकृती केंद्र आणि ४९ ठिकाणी टाकी विसर्जन व्यवस्था आणि सहा फिरत्या विसर्जन व्यवस्था यांचा समावेश आहे.

'फिरत्या व्यवस्थेलाही प्रतिसाद लाभेल'

फिरत्या विसर्जन व्यवस्थेमुळे नागरिकांना विसर्जनाची आणखी एक सुविधा उपलब्ध होणार आहे. ठाण्यातील गणेशोत्सव अधिकाधिक पर्यावरणपूरक असावा यासाठी महापालिकेचे प्रयत्न आहेत. त्याला नागरिकांनीही सकारात्मक प्रतिसाद दिला आहे. तसाच तो या फिरत्या व्यवस्थेलाही मिळेल, असा विश्वास आयुक्त राव यांनी व्यक्त केला आहे.

चार प्रभागात ०६ फिरत्या विसर्जन व्यवस्था

यावर्षी, ०८ (दीड दिवस), १२ (सहा दिवस) आणि १४ सप्टेंबर (१० दिवस) अशा तीन दिवशी ही फिरती विसर्जन व्यवस्था नोपाडा-कोपरी, माजिवडा-मानपाडा, वागळे आणि वतर्कनगर या चार प्रभाग समिती क्षेत्रांमध्ये उपलब्ध असेल. सकाळी १२ ते रात्री १० वाजेपर्यंत प्रभाग समितीमधील विविध ठिकाणी ठराविक काळासाठी हे फिरते वाहन विसर्जन व्यवस्थेसह उपलब्ध राहील. त्यावरील टाकीमध्ये गणेश मूर्तींचे विसर्जन करता येईल. या विसर्जन व्यवस्थेचे वेळापत्रक ठाणे महापालिकेच्या वेबसाईटवर उपलब्ध करण्यात येईल, अशी माहिती मुख्य पर्यावरण अधिकारी मनीषा प्रधान यांनी दिली.

२१४ मंडळांचे परवानगीसाठी अर्ज

महापालिकेच्या ऑनलाईन आणि ऑफलाईन व्यवस्थेत महापालिका क्षेत्रातील एकूण २१४ मंडळांनी परवानगीसाठी अर्ज केले आहेत. त्यापैकी १८४ मंडपांच्या परवानगी देण्यात आल्या आहेत. उर्वरित मंडप परवानगीची प्रक्रिया सुरू असून त्या लवकरच दिल्या जातील, अशी माहिती आयुक्त राव यांनी दिली.

गणेशोत्सवापूर्वी खड्डेमुक्त रस्ते

पावसाने आता चांगली उसंत घेतली आहे. त्यामुूळे रस्ते दुरूस्तीची कामे हाती घेण्यात आली आहेत. उड्डाणपूलांवर, आनंदनगर, ओवळा अशा काही भागात रस्ते खराब झाले आहेत. त्यावरील खड्डे तातडीने भरले जातील. मा. मुख्यमंत्री महोदय यांच्या निर्देशानुसार जलद वाळणाऱ्या पद्धतीच वापर खड्डे बुजवण्यासाठी करण्यात आला. त्याचा चांगला परिणाम दिसला असल्याचेही आयुक्त राव म्हणाले.

टाकी व्यवस्था ४९ ठिकाणी

गेल्यावर्षीपासून महापालिकेने कृत्रिम तलावांच्या सोबतीने छोट्या टाक्यांचीही व्यवस्था विसर्जनासाठी केली होती. त्यानुसार, गेल्यावर्षी ४२ ठिकाणी टाक्यांची सुविधा उपलब्ध होती. ती संख्या यंदा ४९ एवढी करण्यात आली आहे.

१० मूर्ती स्वीकृती केंद्रे

तसेच, जेल तलाव, मढवी हाऊस-राममारुती रोड, महागिरी कोळीवाडा, टेंभी नाका, रिजन्सी हाईट्स-आझादनगर, लोढा लक्झेरिया, कामगार हॉस्पिटल, किसन नगर बस स्टॉप, मॉडेला चेक नाका, देवदया नगर-शिवाई नगर या १० ठिकाणी मूर्ती स्वीकृती केंद्रे आहेत.

१५ ठिकाणी कृत्रिम तलावांची व्यवस्था

आंबेघोसाळे, मासुंदा दत्त घाट, खारीगाव, घोलाईनगर, दातिवली तलाव, खिडकाळी तलाव, न्यू शिवाजी नगर कळवा तलाव, निळकंठ वूड्स- टिकूजीनी वाडी, रेवाळे, बोरिवडे, ब्रम्हांड ऋतू पार्क, हिरानंदानी रायलादेवी-१, रायलादेवी-२, उपवन तलाव परिसर-वर्तकनगर, देवदयानगर अशा १५ ठिकाणी कृत्रिम तलावांची व्यवस्था करण्यात आली आहे.

०९ ठिकाणी विसर्जन घाट

त्याचबरोबर, कोपरी, पारसिक रेती बंदर, रेतीबंदर -१, रेतीबंदर-२-राणानगर, फास्ट ट्रॅक ब्रिज, बाबाजी पाटील वाडी, शंकर मंदिर घाट, कोलशेत, बाळकूम अशा ०९ ठिकाणी विसर्जन घाटांची व्यवस्था आहे.

चार प्रभागात ०६ फिरत्या विसर्जन व्यवस्था

यावर्षी, ०८ स्पटेंबर (दीड दिवस), १२ सप्टेंबर (सहा दिवस), १३ सप्टेंबर (०७ दिवस) आणि १७ सप्टेंबर (११ वा दिवस) अशा चार दिवशी ही फिरती विसर्जन व्यवस्था नोपाडा-कोपरी, माजिवडा-मानपाडा, वागळे आणि वतर्कनगर या चार प्रभाग समिती क्षेत्रांमध्ये उपलब्ध असेल. सकाळी १२ ते रात्री १० वाजेपर्यंत प्रभाग समितीमधील विविध ठिकाणी ठराविक काळासाठी हे फिरते वाहन विसर्जन व्यवस्थेसह उपलब्ध राहील. त्यावरील टाकीमध्ये गणेश मूर्तींचे विसर्जन करता येईल. या विसर्जन व्यवस्थेचे वेळापत्रक ठाणे महापालिकेच्या वेबसाईटवर उपलब्ध करण्यात येईल, अशी माहिती मुख्य पर्यावरण अधिकारी मनीषा प्रधान यांनी दिली.