ठाणे शहर दैनिक पत्रकार संघातर्फे वामन म्हात्रेंचा निषेध ठाणे ः

   

बदलापूर येथे बालिकांवर अत्याचाराच्या घटनेचा पाठपुरावा करणार्या महिला पत्रकारांस अश्लील शब्दात समज देवून अपमानस्पद वागणूक करणारे अंबरनाथचे माजी नगराध्यक्ष वामन म्हात्रे यांचा ठाणे शहर दैनिक पत्रकार संघाच्या वतीने निषेध आंदोलन करण्यात आले. या वर्तनाबद्दल वामन म्हात्रे यांच्या विरोधात गुन्हा दाखल करण्याची मागणीचे निवेदन  ठाणे शहर दैनिक पत्रकार संघाच्या वतीने निवासी जिल्हाधिकारी संदीप माने यांना सादर करण्यात आले. 

बदलापूर येथील शाळेत दोन बालिकांवर घडलेल्या अत्याचाराच्या प्रकणात पत्रकार या नात्याने तेथील स्थानिक पत्रकार मोहिनी जाधव या पाठपुरावा करत होत्या. त्यावेळी शिवसेना शिंदे गटाचे नेते व अंबरनाथचे माजी नगराध्यक्ष वामन म्हात्रे यांनी लज्जा उत्पन्न होईल, अशा अश्लील भाषेत पत्रकार जाधव यांच्याशी संभाषण केले. या वर्तनाबद्दल म्हात्रे यांच्यावर गुन्हा दाखल करण्यास पोलीस यंत्रणा टाळाटाळ करत आहे. त्या पार्श्वभूमीवर म्हात्रे यांच्या वर्तनाचा व वक्तव्याचा निषेध करण्यासाठी ठाणे शहर दैनिक पत्रकार संघाच्या वतीने ठाणे जिल्हाधिकारी कार्यालयासमोर काळ्या फिती लावून आंदोलन करण्यात आले. यावेळी पत्रकारांनी म्हात्रे यांच्या निषेधाच्या घोषणा देत पोलिसांनी योग्य ती कारवाई करण्याची मागणी केली. या आंदोलनात ठाणे शहर दैनिक पत्रकार संघाचे अध्यक्ष आनंद कांबळे, सरचिटणीस निलेश पानमंद, कार्याध्यक्ष विकास काटे,  उपाध्यक्ष दीपक शेलार, दिलीप शिंदे, खजिनदार विभव बिरवटकर,  हेमलता  वाडकर, प्रज्ञा म्हात्रे, सारिका सांळुखे, जयश्री शेट्टी, अनघा सुर्वे, श्रध्दा कांदळकर,  नम्रता सूर्यवंशी, संपदा शिंदे, वंशिका चाचे,राहुल क्षीरसागर, गणेश पारकर, धनेश पाटील, वीरेंद्र मिश्रा, गजानन हरिमकर, दीपक कुरकुंडे आदि पत्रकार बांधव - भगिनी सहभागी झाले होते. 

महिला पत्रकार मोठ्या संख्येने कार्यरत आहेत, त्यांना काम करतांना सुरक्षित वातावरण असणे गरजेचे आहे, मात्र शिवसेनेचे वामन म्हात्रे यांनी कर्तव्य बजावणार्या महिला पत्रकाराला उद्देशन जे वक्तव्य केले, ते निषेधार्ह आहे, त्यामुळे त्यांना अटक करून महिला पत्रकारास न्याय द्यावा, ्अशी मागणी ठाणे शहर दैनिक पत्रकार संघाचे अध्यक्ष आनंद कांबळे यांनी यावेळी केली. निवासी उपजिल्हाधिकार्यांना ठाणे शहर दैनिक पत्रकार संघाचे अध्यक्ष आनंद कांबळे यांच्या शिष्टमंडळाने निवेदन दिले. या शिष्टमंडळात दिलीप शिंदे, दीपक शेलार, गणेश पारकर, हेमलता वाडकर, प्रज्ञा म्हात्रे, सारिका साळुंखे, अनुपमा गुंडे, जयश्री शेट्टी, नम्रता सूर्यवंशी, धनेश पाटील यांचा समावेश होता.