घोडबंदर रोडसाठी स्वतंत्र 'विकास हेड' नेमा, नवी मुंबईच्या धर्तीवर विकास करा: शिवसेना नेते रवि घरत यांची मागणी

झपाट्याने वाढणारे नागरीकरण, पायाभूत सुविधांवर ताण; जलद व नियोजनबद्ध विकासासाठी स्वतंत्र विभागाची गरज

ठाणे शहराचा विस्तार घोडबंदर रोडच्या दिशेने वेगाने होत असून वाढती लोकसंख्या व गृहनिर्माण प्रकल्प पाहता या परिसराचा नवी मुंबईच्या धर्तीवर नियोजनबद्ध व आधुनिक विकास करणे गरजेचे आहे. यासाठी घोडबंदर रोडकरिता स्वतंत्र 'विकास हेड' व स्वतंत्र विकास विभागाची स्थापना करावी, अशी आग्रही मागणी शिवसेनेचे विभाग प्रमुख रवि घरत यांनी केली आहे.

का गरज आहे स्वतंत्र विकास हेडची?

घोडबंदर रोड हा आता केवळ विस्ताराचा भाग नसून ठाण्याच्या भविष्यातील विकासाचा केंद्रबिंदू बनला आहे. मात्र वाढत्या लोकसंख्येमुळे येथील पायाभूत सुविधांवर प्रचंड ताण पडत आहे. यावर कायमस्वरूपी तोडगा काढण्यासाठी दूरदृष्टीने नियोजन करणे काळाची गरज असल्याचे घरत यांनी म्हटले आहे.

घरत यांच्या मागणीतील प्रमुख मुद्दे:

1. पायाभूत सुविधा: रस्ते, वाहतूक, पाणीपुरवठा व सांडपाणी व्यवस्थापनाचे सुयोग्य नियोजन.

2. सार्वजनिक सुविधा: सुसज्ज उद्याने, क्रीडांगणे व नागरिकांसाठी इतर सुविधांची निर्मिती.

3. आरोग्य व शिक्षण:आधुनिक रुग्णालये आणि दर्जेदार शाळा-महाविद्यालयांचे जाळे उभारणी.

"स्वतंत्र विकास हेड मिळाल्यास निधीचे योग्य वाटप होऊन विकासकामांना गती मिळेल. घोडबंदर रोडचा विकास वेगाने, शाश्वत व नागरिकाभिमुख पद्धतीने होण्यास मदत होईल," असा विश्वास रवि घरत यांनी व्यक्त केला.

नागरिकांच्या हितासाठी व भावी पिढ्यांच्या उज्ज्वल भविष्यासाठी प्रशासनाने या मागणीचा सकारात्मक विचार करून तातडीने निर्णय घ्यावा, अशी अपेक्षाही त्यांनी व्यक्त केली.