मातृभूमीसाठी सर्वोच्च बलिदान देणाऱ्या दोन जवानांना उपमुख्यमंत्री एकनाथ शिंदे यांनी वाहिली श्रद्धांजली

उरी सेक्टरमध्ये महाराष्ट्राचे दोन सुपुत्रांना आले वीरमरण

मुंबई | प्रतिनिधी

जम्मू-काश्मीरमधील उरी सेक्टरजवळील कमलकोट परिसरात झालेल्या भीषण स्फोटात महाराष्ट्राच्या दोन सुपुत्रांना वीरमरण आल्याने संपूर्ण राज्य शोकसागरात बुडाले आहे. नवी मुंबईतील ऐरोलीचे विक्रम बाळकृष्ण चव्हाण आणि सातारा जिल्ह्यातील कराड तालुक्यातील शहापूरचे अर्जुन राजेंद्र जाधव यांनी देशाच्या सीमेचे रक्षण करताना सर्वोच्च बलिदान दिले. या दुःखद घटनेबद्दल उपमुख्यमंत्री एकनाथ शिंदे यांनी भावपूर्ण श्रद्धांजली वाहत शहीद जवानांच्या कुटुंबियांच्या दुःखात संपूर्ण देश सहभागी असल्याची भावना व्यक्त केली आहे. 

उपमुख्यमंत्री शिंदे यांनी 'एक्स'वरील आपल्या संदेशात म्हटले की, "जम्मू काश्मीरमध्ये उरी सेक्टरजवळील कमलकोट येथे झालेल्या भीषण स्फोटात सीमेवर कर्तव्य बजावणाऱ्या दोन जवानांना काल वीरमरण आले. यात नवी मुंबईतील ऐरोलीचे विक्रम चव्हाण आणि सातारा जिल्ह्यातील कराड तालुक्यातील शहापूरचे अर्जुन जाधव यांचा समावेश होता. मायभूमीसाठी सर्वोच्च बलिदान देणाऱ्या या दोन्ही वीर जवानांना मी भावपूर्ण श्रद्धांजली अर्पण करतो. तसेच एक देशवासीय म्हणून या दोन्ही शहीदांच्या कुटुंबियांच्या दुःखात आम्ही सारे सहभागी आहोत."

सीमेवर देशाच्या सुरक्षेसाठी अहोरात्र तैनात असलेले जवान आपल्या जीवाची पर्वा न करता राष्ट्रसेवेचे कर्तव्य पार पाडत असतात. अशाच कर्तव्य बजावत असताना कमलकोट परिसरात झालेल्या भीषण स्फोटात विक्रम चव्हाण आणि अर्जुन जाधव यांना वीरमरण आले. त्यांच्या निधनाची बातमी समोर येताच नवी मुंबईतील ऐरोली आणि सातारा जिल्ह्यातील शहापूर परिसरात शोककळा पसरली.

दोन्ही जवानांनी आपल्या कुटुंबाचा विचार न करता मातृभूमीच्या रक्षणासाठी आयुष्य समर्पित केले होते. त्यांच्या बलिदानामुळे देशाच्या सुरक्षेसाठी जवान किती मोठी किंमत मोजतात, याची पुन्हा एकदा जाणीव झाली आहे. त्यांच्या जाण्याने कुटुंबियांसह मित्रपरिवार आणि गावकऱ्यांवर दुःखाचा डोंगर कोसळला आहे.

दरम्यान, राज्यातील विविध राजकीय, सामाजिक आणि प्रशासकीय स्तरातून या दोन्ही शहीद जवानांना श्रद्धांजली अर्पण करण्यात येत आहे. सोशल मीडियावरही नागरिकांकडून हळहळ व्यक्त केली जात असून, त्यांच्या शौर्याला सलाम केला जात आहे.

देशासाठी प्राणांची आहुती देणारे विक्रम चव्हाण आणि अर्जुन जाधव यांचे बलिदान कायम स्मरणात राहील. त्यांच्या शौर्य, राष्ट्रनिष्ठा आणि कर्तव्यपरायणतेमुळे भावी पिढ्यांना प्रेरणा मिळत राहील.