'इंधन बचतीसाठी' उपमुख्यमंत्री शिंदेंनी खाजगी विमान टाळले, एअर इंडियाच्या प्रवासी विमानाने दिल्लीला रवाना

- PM मोदींच्या आवाहनाला प्रतिसाद: खाजगी विमानाऐवजी प्रवासी विमानाने प्रवास

- मुंबई विमानतळावर स्वागत: नागरिकांनी काढले फोटो, दिली निवेदने

- स्वच्छ भारत मिशन बैठकीसाठी दिल्ली दौरा: 19-20 मे रोजी केंद्रीय नगरविकास विभागाची आढावा बैठक

- EV गाडी, ताफ्यात कपात: आधीच वाहनांची संख्या कमी, हेलिकॉप्टर दौरेही कमी केले

- फडणवीसांची नियमावली: मंत्र्यांसाठी इंधन बचतीचे निर्देश जारी

मुंबई : पंतप्रधान नरेंद्र मोदी यांच्या इंधन बचतीच्या आवाहनाला प्रतिसाद देत उपमुख्यमंत्री एकनाथ शिंदे यांनी आज दिल्ली दौऱ्यासाठी खाजगी विमानाऐवजी एअर इंडियाच्या प्रवासी विमानाला प्राधान्य दिले. आज दुपारी 4 वाजताच्या विमानाने ते मुंबईहून दिल्लीला रवाना झाले.

विमानतळावर नागरिकांचा उत्साह

मुंबई विमानतळावर शिंदे यांचे उत्साहात स्वागत झाले. यावेळी अनेक नागरिकांनी त्यांच्यासोबत फोटो काढले तर काहींनी निवेदने दिली. सर्वांचे अभिवादन स्वीकारत शिंदे यांनी विमान गाठले.

स्वच्छ भारत मिशनच्या बैठकीसाठी दौरा

केंद्रीय नगरविकास विभागाच्या वतीने दिल्लीत 'स्वच्छ भारत मिशन अर्बन 2.0' ची विशेष आढावा बैठक आज आणि उद्या आयोजित केली आहे. या बैठकीत सहभागी होण्यासाठी शिंदे दिल्लीला गेले आहेत. उद्या ते स्वतः बैठकीत सहभागी होणार आहेत.

इंधन बचतीसाठी सातत्याने पावले

जागतिक बाजारात तेलाच्या किंमती वाढल्याने पंतप्रधान मोदींनी देशवासीयांना इंधन बचतीचा संदेश दिला होता. मुख्यमंत्री देवेंद्र फडणवीस यांनीही याबाबत मंत्र्यांसाठी नियमावली जाहीर केली होती. 

यानंतर शिंदे यांनी तत्काळ EV गाडी वापरण्याचा निर्णय घेतला, ताफ्यातील वाहनांची संख्या कमी केली आणि हेलिकॉप्टरने होणारे दौरेही कमी केले आहेत. आता खाजगी विमानाऐवजी प्रवासी विमानाने प्रवास करून त्यांनी मोदींच्या आवाहनाचे पालन केल्याचे दिसून येते.