ठाणे महापालिकेच्यावतीने भारतीय प्रजासत्ताक दिन मोठ्या उत्साहात साजरा

सफाई कर्मचारी 'गुणवंत कामगार' पुरस्काराने सन्मानित
कचरा वर्गीकरण करणाऱ्या गृहनिर्माण संस्थांचाही गौरव

ठाणे ( : भारतीय प्रजासत्ताक दिनाचा ७४वा वर्धापन दिन ठाणे महानगरपलिकेच्यावतीने शुक्रवारी मोठया उत्साहात साजरा करण्यात आला. महापालिका मुख्यालयाच्या प्रांगणात आयुक्त तथा प्रशासक अभिजीत बांगर यांनी राष्ट्रध्वजवंदन केले. यावेळी ठाणे महानगरपालिकेचे सुरक्षा दल, अग्निशमन दलाचे जवान, आपत्ती व्यवस्थापन दलाचे जवान यांनी राष्ट्रध्वजाला मानवंदना दिली.

ध्वजवंदन सोहळ्यानंतर ठाणे शहराच्या स्वच्छतेसाठी योगदान देणाऱ्या ठाणे महापालिकेच्या सफाई कर्मचाऱ्यांचा गुणवंत कामगार पुरस्कार देऊन आयुक्त अभिजीत बांगर यांनी सन्मान केला. सुनीता खरे, भाग्यश्री कोचकर, अनिता काशिद, प्रतिभा जाधव, नंदा कारंडे, पोपट वाघचौरे, मच्छिंद्र बेडेकर, राजेंद्र मालुसरे, हरिश्चंद्र खुराटकर, सुजीतकुमार वाल्मिकी या सफाई कर्मचाऱ्यांचा गौरव करण्यात आला. तसेच, सूयोग्य पद्धतीने कचरा वर्गीकरण करणाऱ्या ठाण्यातील, विराट सोसायटी, रिजन्सी हाईट्स सोसायटी, अॅकोलेड सोसायटी आणि कोरस टॉवर कॉम्प्लेक्स या चार गृहनिर्माण संस्थांचाही याप्रसंगी आयुक्त अभिजीत बांगर यांच्या हस्ते गौरव करण्यात आला.

ध्वजवंदन सोहळ्यास, परिवहन समितीचे सभापती विलास जोशी, माजी नगरसेवक नारायण पवार, संदीप लेले, विकास रेपाळे, अतिरिक्त आयुक्त (१) संदीप माळवी, अतिरिक्त आयुक्त (२) प्रशांत रोडे सर्व वरिष्ठ अधिकारी, कर्मचारी आदी उपस्थित होते. प्रांगणातील सोहळ्यानंतर, महापालिका भवन येथील कै. नरेंद्र बल्लाळ सभागृहात महनीय व्यक्तींच्या प्रतिमांना पुष्पहार अर्पण करण्यात आला. त्याबरोबरच, महापालिका क्षेत्रातील महनीय व्यक्तींच्या पुतळयांना पुष्पहार अर्पण करुन अभिवादन करण्यात आले.

तसेच, मासुंदा तलाव येथील छत्रपती शिवाजी महाराज यांच्या अश्वारुढ पुतळ्यास आणि कोर्ट नाका येथील भारतरत्न डॉ. बाबासाहेब आंबेडकर यांच्या पुतळ्यास महापालिका आयुक्त अभिजीत बांगर यांनी पुष्पहार अर्पण करून वंदन केले. त्यावेळी, अतिरिक्त आयुक्त (१) संदीप माळवी, अतिरिक्त आयुक्त (२) प्रशांत रोडे, उपायुक्त (माहिती व जनसंपर्क) उमेश बिरारी उपस्थित होते.